Det er vel slik at mange er overgjevne over byråkratiet, om det nå er rett eller galt tenkt. Det er nok avhengig av auga som ser. John Felle, far til Ragnhild som bur på Lunde, dreiv med lastebil, tømmerkøyring og han var også med i ei familiær entreprenørverksemd. Han var ein godmodig mann, og han kunne kome med gode kommentarar. Eit uttrykk som John mykje bruka i si daglegtale var; gut-ta-deg.
Etter kvart blei det ein del maskiner og utstyr i samband med verksemda, og det ble trong for å byggje eit verkstadbygg. Bygget blei oppførd etter eigen godkjenning, om ein kan sei det på den måten. Etter ei tid blei kommunens byggesaksavdeling merksam på byggverket som hadde blitt oppførd. For å få dette inn på rette sporet i det kommunale sakssystemet, tok ein kommunal sakshandsamar kontakt med John, og dei gjorde avtale om ei synfaring.
På denne tida arbeide eg med framføring av ein skogsbilveg nær Felle, og eg var saman med blant andre John. Dagen kom då han skulle møte den kommunale byråkraten, og han køyrde av stad for å møte vedkomande. Det var ein mann, han var høg, og han kom køyrande i ein Morris mini. Då han steig ut av bilen, stod han og kikka på bygget, og så hadde han kome med ein litt syrleg kommentar som John syntes lite om. Han blei rett ut sagt temmeleg ergeleg, ja truleg litt fornærma også.
Da John kom tilbake på vegarbeidet, hadde me andre matpausa. John sette seg ned, tok fram nista og fylte seg ein kopp kaffi. Han rista litt på hendene mens han fylte i koppen, då forarginga etter møte sat i kroppen endå. Han sette seg til rette, og fortalde oss om møtet. Han byrja forteljinga med fylgjande kraftsalve: ”Gut-ta-deg, så kom det et langt rækel av et menneske ut av ein ende av ein bil, og stod der å glodde og trudde han eigde heile verden!!!” Ja slik kan det kommunale byråkratiet opplevast.
Den same John bygde ein skogsveg, som skogsteknikkar Olav Hardeberg hadde stikka, og som han også var byggjeleiar for. Hardeberg hadde markera der det skulle leggjast ned stikkrenner. På ein av stadane hadde ikkje John lagt ned stikkrenna som Hardberg hadde planlagt skulle vere der. Grunnen var at John meinte stikkrenna var plassera på ein stad det ikkje var trong for ei stikkrenne. Vurderinga hans var at det ikkje kom til å renne vatn der. Ein dag dei hadde ein gjennomgang av arbeidet som var utført, fekk Hardeberg sjå at stikkrenna ikkje var lagd, og han kommentera dette overfor John. Han svara Hardeberg på fylgjande måte: ”Gut-ta-deg, kan du skaffe vatn, så skal eg skaffe røyr.”
På byrjinga av 1960-talet, kjøpte John seg ein, for han, ny lastebil. Det var ein Ford, med merkenamn F-600. Han blei spurd om kva F-600 stod for, og då svara han at lastebilen var av merket Ford Fuball sekshondre.
For øvrig. Samanslåing av kommunar har vore, og er endå, eit heitt tema. Nå ser eg føre meg ei verkeleg stor samanslåing, og den ser ut til å vere mykje betre planlagd enn det Sanner fekk til. Putin skal ha hakka seg inn på nettet og fiffa litt på valresultatet til Trump. Nå har Trump utnemnd ein utanriksminister som har blitt tildelt den russiske Vennskapsordenen. Det blir spennande å sjå kva plan dei to har vidare, om det blir samanslåing eller om dei kjem til å nøye seg med å hakke på nettet for kvarandre. Eitt er klart for min del, dei bør bli tildelt Nobels fredspris, for dette kan ikkje føre til anna enn forsoning mellom dei to landa etter min oppfatning.
Halvor Røylen
