«Vi bygger ikke ned kirkebygda. Vi gjør faktisk det motsatte». Dette uttaler ordførar Steinar Pedersen på nettstaden iGjerstad.
Det høyrest ut som ein festtale for velvillige tilhøyrar, eller kanskje ein tale til Høgres årsmøte. For dei flest av oss andre synes det som at han er angripen av tunellsyn, med smalast mogeleg synsvinkel. Ja, det er bra det som skjer på kommunehuset. Kommunen gjev eit generøst tilbod til lag og foreiningar og andre som treng eit lokale. Og skapar plass til eit livssynsnøytralt seremonirom, som kommunen er pålagt å tilby.
Men dersom synsvinkelen blir auka litt, kva ser vi då? Eg skal ikkje liste opp alle dei funksjonar og institusjonar som er flytta frå øvre Gjerstad til ytre del av bygda, men nøyer meg med å nemne skule, legekontor og lensmann. Lista kunne vere mykje lengre. Noko av det har kommunen hatt kontroll over, anna følger med i dragsuget. Når det blir protestert mot dette får me høyre at det er utviklinga, me kan ikkje strete imot. Men skal det vere slik at utviklinga er einvegskøyrd? Me er då bare ei lita bygd, seier nokon! Me må slutte å snakke om øvre- og ytre. Det er ikkje så lett når me opplever at alt bare blir flytta ein veg. Eg meiner ikkje at alt som har skjedd i bygda er feil og negativt, men når totalinntrykket så tydeleg, og viser det at det går bare ein veg, er det vanskeleg å se at heile bygda er likeverdig.
Det er i gong ei utgreiing om barnehagestrukturen i Gjerstad. Og no skal biblioteksdrifta utgreiast. Ordføraren har rekna ut at det koster kommunen kr 340 pr utlånt bok å oppfylle denne lovbestemte tenesta. Kanskje burde me gjøre tilsvarande utrekningar for alle tenestene i kommunen, og finne ut kva som løner seg og ikkje? Men biblioteket er så mykje meir enn utlån av bøker.
Eg er innom biblioteket fleire gonger kvar månad, og eg ser noko av det som føregår der. Dersom ein ønsker bøker som ikkje finst der, låner dei inn frå andre bibliotek. Det er ein møteplass der folk kan kome inn og sitte ned, og sjå i blader og bøker. Det er forfattarkveldar, der ein kan møte interessante folk. Der er diskusjonskveldar, og det er informasjonsmateriell om ting som føregår i bygda. Eg registrerer at folk kjem dit med mobiltelefonar og PCar som har slått seg vrange, og får god og kyndig hjelp, og biblioteket driv med arbeidstrening for folk som treng det. Der står PCar som blir brukt av folk som ikkje har tilgang til eigne maskiner. Bibliotekaren har dessutan andre oppgåver i kultursektoren utanom biblioteket. Ettersom biblioteket ligg på ein offentleg plass med andre tilbod rundt, er det ein låg terskel for å kome dit.
Eg høyrer at det blir tenkt på å flytte biblioteket til Abel skole. Det vil bli ein mykje høgare terskel å kome over for å gå inn der, anten det er i eller utanfor skuletida. Det vil fort feste seg ei kjensle av at dette er noko som høyrer til skulen, og ikkje så mykje for folk flest.
Eg meiner ikkje at alt må vere som det er. Me må ta vare på dei gode tilboda me har, og bygge vidare på dei. Dersom det skal vere noko i at det skal satsast på kultur i Kjørkebygda så må biblioteket bli verande der. Tilbodet bør vere minst like stort som det er i dag. Bruk utgreiinga som er i gong til å tenke på nye oppgåver biblioteket kan få for å styrke denne viktige servicen til innbyggarane i Gjerstad. La biblioteket bli ein viktig møteplass for alle!
Kåre Dalane
