Det gjør ikkje Erna, Jonas eller Sylvi heller. Valgkampen, i alle fall i riksmedier, handlar ofte mest om dei, ikkje minst no under Arendalsveka. Men her i Gjerstad må me klare oss med våre lokale heltar. «Etter bylgjedal kjem båra», heiter det i Gjerstadsongen. Slik er det oftast i rikspolitikken òg. Høgrebølger og venstrebølger, og av og til ei SP- eller Frp-bølge kjem og forsvinn att. Vidar Sandbeck song i førre hundreåret at populariteten kjem og populariteten går. Denne sommaren har vist oss at desse visdomsorda er like aktuelle i dag.
No gjeld det kommunevalget. Koalisjonar og samarbeid går på kryss og tvers i kommunane, ofte heilt ulikt det som gjeld på riksplan. Kva er då viktig? Svaret er enkelt: Kven som kjem inn i kommunestyret, og kva dei står for. Noko av svaret finn me i dei lokale partiprogramma, på valglistene og gjennom kjennskap til folk som har vore i kommunestyret før, og som ønsker å kome inn att. Partiprogramma er viktige, men dei omfattar ikkje alt. Gjennom ein 4-års periode kjem det opp ei rekke saker med nye problemstillingar, og som ingen tenkte på då dei skreiv programmet. Då er det viktig å ha folk med gode holdningar, og som er villige til å kjempe for synet sitt.
I den perioden som no snart er slutt har Gjerstad Senterparti hatt ei svært aktiv kommunestyregruppe, som har arbeidd for saker dei synest er viktige. Fleire av frå denne gruppa stiller no til valg på nytt, og mange nye, friske stemmer er komne til.Senterpartiet har den lågaste snittalderen på listekandidatane, og har den einaste lista med folk under 30 år.
Men kven er ho som står på toppen av lista, har folk spurt meg. Det er Maria, det. Ho er eit godt eksempel på slike folk me ønsker i bygda. Ung, initiativrik yrkeskvinne, som har flytta til Gjerstad og etablert seg her, og har engasjert seg i lokalsamfunnet og politikken. Folk i Gjerstad er heldige dersom dei får Maria Heiland til ordførar.
For Gjerstad Senterparti er det viktigaste at heile bygda skal vere ein god plass å bu for alle, og at Gjerstad framleis skal vere ein eigen kommune. Den første delen er viktig: Politikken må sørge for at folk blir tatt vare på og får utfolde seg ut frå føresetnadane sine. Dei fleste som stiller til valg er nok einige i det. Korleis me skal få det til, kan variere. Og dessutan vil Senterpartiet at heile bygda skal vere levande, med liv og gode tilbod. Dette vil alltid vere ei viktig sak for Senterpartiet. Dei som har følgt med i kommunestyremøta i denne perioden har sett at Senterpartiet har arbeidd aktivt for desse sakene. Som det førande opposisjonspartiet har Senterpartiet kjempa for å få til gode løysingar. Og det vil Senterpartiet halde på med, anten det blir i opposisjon som no, eller i posisjon som gir større makt til å få gjennomført SP-politikk. Det er det velgarane som avgjør!
At Gjerstad skal vere ein eigen kommune, vil Senterpartiet vere den fremste garantisten for, dersom dei får makt til det. Dei kan sjølvsagt ikkje garantere for kva for tvang eller verkemiddel ei eventuell ny Høgreregjering kan finne på, men vårt standpunkt er klart.
Kva blir så dei viktigaste kampsakene i komande periode? Me som har gått på søndagsskulen har lært om dei fire B-ane. No er det tre B-ar som gjeld: Brannstasjon, barnehage og bibliotek. At desse framleis blir i kjørkebygda er vel verd å kjempe for.
Dei folka som står på valglista til Senterpartiet er svært godt kvalifiserte til å finne gode løysingar for bygda. Her er mykje ungt blod. Folk med friske meiningar og god kunnskap, og folk med lang erfaring frå kommunepolitikken. Så får Trygve og Jonas og dei andre halde på med sitt. No er det Gjerstad som gjeld, og Senterpartiet vil kjempe for at Gjerstad skal vere ei god og levande bygd.
Kåre Dalane
